機管局大話連篇 公信力蕩然無存

大家一定記得，本報前年曾經報道，有市民喺機場行李認領區目擊盜竊案發生，機場保安袖手旁觀不特止，仲任由賊人逃去無蹤。市民要求機管局翻查閉路電視，點知機管局居然聲稱閉路電視僅作即時監控之用，並無錄影功能喎，你信唔信吖？

信佢一成，雙目失明吖。呢嗱，該名市民向本報及立法會議員投訴，機管局終於承認閉路電視有錄影功能，但仍然死雞撐飯蓋，先引用《私隱條例》爭辯，後來索性諉過前線員工「不誠實」，擺明卸責。連申訴專員公署都睇唔過眼，怒轟機管局管理層嘅操守及思維模式「匪夷所思」，法定機構居然要職員講大話係「聞所未聞」，仲因為大話不斷而令簡單投訴拖延十五個月，做法完全不可接受。

冇錯嘞，如果唔係多得良好市民挺身舉報，同埋正義傳媒鍥而不捨追查，真相可能永遠石沉大海o架。最荒謬嘅係，機管局原來一早為前線職員擬訂一份旅客查詢指引，員工必須拒絕公眾查閱閉路電視嘅要求。即係話，員工只不過按本子辦事啫，何來「不誠實」呢？難為機管局仲厚顏無恥聲稱咁做係出於善意，希望安撫投訴人嘅負面情緒喎，真係唔知個醜字點寫。

嗱，一次不忠，百次不用，嗰位良好市民就講得啱嘞，機管局咁小事都要講大話，一啲誠信都冇，叫人點相信第三條跑道會搞得好吖？點相信機場係安全吖？申訴專員直斥機管局管理層嘅思維有問題，自毀公信力，需要再培訓。其實計太一叮話齋，再培訓都係嘥氣嘅咋，對付呢啲庸官，唔需要手軟o架。

講真，機場保安形同虛設都唔係新聞嘞，本報曾揭發背囊客可通過金屬探測器直闖禁區；空郵中心安檢人員當值玩手機、瞌眼瞓，甚至有人大模廝樣走入捷運系統管道，成個無掩雞籠咁，問你怕未。

唔怕一萬，最怕萬一。家陣時勢立立亂，恐怖分子無處不在，機場保安鬆懈成咁，同開門揖盜冇乜分別嘅咋。事實再次證明，機管局管理層根本冇做好自己份工，一於叫佢哋查找不足喇，叮！