城中鏡：以訪德誘入富貴黨 謝偉俊唔落疊
富貴黨前黨魁田北俊「被搣」全國政協委員資格後，形勢大不如前，該黨目前重點工作之一係吸納政界人士、區議員救亡，最近黨主席Felix鍾國斌疑將今年三月德國政府「全包宴」訪問團嘅名額，吸引獨立議員Paul謝偉俊入黨，據聞阿Paul不為所動，最後更喺「三揀二」抽中有得去德國。區區十零萬團費就想引人入黨？睇嚟都係講笑居多。
謝偉俊（圖）抽中去德國團，鍾國斌無功而還。
鍾國斌
話說德國政府今年三月邀請立法會議員到柏林及一個聯邦州訪問，初步建議不多於九位議員前赴當地，按慣例各黨派、獨立議員按比例分配代表團名額。Felix透露，該黨獲分配一個名額，其後講講吓更爆料，知悉阿Paul同兩名獨立議員共三人爭取兩個名額，佢曾以該黨名額吸引阿Paul，笑言佢肯加入該黨就直接有得去喎。
阿Paul接受查詢時笑言，入黨唔會為咗呢啲原因，又話最終名額「三揀二」，佢同教育界議員葉建源抽中有得去德國，建築、測量及都市規劃界謝偉銓就抽唔中，依家抽中咗就唔使入黨喇！
