城中鏡：新世界深圳辦「短途」馬拉松
香港人最鍾意跑步，除咗有啱啱完結嘅渣打馬拉松之外，我哋發現原來新世界發展喺深圳前海都搞咗個運動嘉年華，吸引到三千名跑步好手參加呢個別開生面嘅新世界馬拉松賽事。
鄭志剛（左）只係為馬拉松主持鳴槍儀式，無落場跑埋一份。
話說個嘉年華其實早過渣打馬拉松一日舉行，由新世界發展贊助同承辦，名為「前海首屆深港運動嘉年華」，超過三千人參加活動，當中有超過六十間來自新世界嘅成員公司，好似新世界地產、新創建等等嘅員工出席。最矚目嘅賽事，當然就係馬拉松項目，不過路程就短咗啲，只有五公里啫！
而新世界系「第三代傳人」鄭志剛就負責主持今次五公里馬拉松嘅鳴槍儀式，不過唔知係咪因為平日工作比較忙，無乜時間做運動，所以今次佢就無落場同選手跑埋一份。
