大搜查：車場左邊拍卡玩殘司機
「你以為喺右邊，其實喺左邊至啱！汽車收費閘居然左右調轉，要喺乘客位先拍到卡，咁離奇？」為免保安員處理逾時停泊鎖車輛時與司機爭執，將軍澳翠林邨短期內將以收費閘取代人手，惟措施未出已遭非議。有道路專家指由於汽車收費閘設於司機的左邊，如果旁邊沒乘客，司機便要落車兜大圈才能拍卡出入閘，「要司機落車真係好唔方便，仲好危險。」直斥汽車收費閘的設計不合理，更擔心的是一旦司機未拉手掣便落車拍卡，隨時會引致交通意外。
翠林邨
將軍澳翠林邨即將安裝汽車收費閘的入口，僅闊六點七五米。
西貢區區議員譚領律認為，該處道路太窄，無法在中央位置加設汽車收費閘。
蒙海強直斥於司機左邊設置汽車收費閘並不合理。 （資料圖片）
造成不便
朱先生（商業界）：「唔少司機會唔熄匙就落車拍卡，架車一郁就好危險。」
吳小姐（時裝業）：「要司機落車拍卡，真係好唔方便，希望有關當局會諗辦法改善。」
「左邊拍卡收費閘」並非整蠱工具，而且將設於入伙二十七年的將軍澳翠林邨。它的「面世」，是因為這情景經常出現，「明明我泊咗十分鐘，點解要趕我走？前面架車都泊咗好耐，你哋又唔鎖佢？」過往，一直由更亭的保安員負責處理鎖車地帶的鎖車工作，但因計算時間問題，不時與司機發生爭執，業主立案法團遂決定安裝汽車收費閘徵收罰款，取代人手鎖車。
翠林邨的鎖車地帶，範圍只有數百米長，包括一個迴旋處路段屬於雙線行車，入口闊六點七五米，僅僅符合《運輸策劃及設計手冊》所建議的雙程車路闊度。該邨准許車輛停泊不多於十五分鐘，逾時會鎖車，司機需繳交三百二十元的開鎖費。至於即將使用的汽車收費閘，首十五分鐘將會免費，十六至三十分鐘會收費五十元，其後每三十分鐘會收費一百元。
潛伏交通意外危機
「最近揸車經過，見到呢個汽車收費閘，竟然係左邊拍卡，覺得好騎呢。」司機陳先生擔心汽車收費閘啟用之後，司機入閘及出閘都需要落車拍卡，會引起不便。「如果司機係傷殘人士，又或者落雨就好唔方便。」
西貢區區議員譚領律指出，該處道路太窄，無法在中央位置加設收費閘。「道路規定要左上右落，如果將佢改成右上左落，可能會引起混亂，收費閘調轉都係冇辦法之中嘅辦法。」
惟道路交通安全委員會主席蒙海強直斥調轉設置汽車收費閘並不合理，且有兩大危險。第一，不少司機落車拍卡時可能不會熄匙；第二，司機或會因急忙，拉不實手掣便落車。他指出，一旦車子仍處於移動狀態，便會有潛在道路危機，易引發交通意外。
倡置自動繳費系統
「如果道路太窄，無法將收費閘裝在中央，可考慮其他收錢方法。」香港汽車工業學會會長李耀培建議將汽車收費閘拆去，轉做自動繳費系統，又或安裝付帳機，「前者好似過海隧道咁，自動紀錄過數，後者就畀司機泊好車，再行去付帳機畀錢。」他補充，另一方法是將通道改為單線行車，兩邊皆安裝汽車收費閘及紅綠燈，但建造費用會較高昂。
有關管理處發言人指，為免車輛於緊急通道上違例停泊，業主立案法團議決安裝八達通出入系統管制措施，其中彩林樓的緊急通道因路寬限制，車閘要安裝在車路的兩旁，司機須落車拍卡才可進出。
