政壇：工商界議員聯手撐外勞

批發及零售界議員方剛話，由於建造業工人嚴重不足，唔少政府工程都出現不同程度嘅延誤，港鐵沙中線、南港島線遲遲未通車，公屋又遲遲未起好，要求政府盡快推行補充勞工計劃輸入外勞，等延誤中嘅工程可以盡快落成。

飲食界張宇人亦話業界喺八十至九十年代發展蓬勃，都係因為當年政府容許飲食業輸入外勞，但依家政府叫停補充勞工計劃，令多個行業發展停滯不前，要求政府優化現有政策方便僱主。

見到工商界猛咁叫政府考慮大規模輸入外勞，勞聯潘兆平引述有工人投訴承建商假招聘，製造請唔到工人嘅假象，為輸入外勞鋪路。工聯會陳婉嫻就質疑勞工顧問委員會，無視勞方嘅意見，拒要求政府喺推行補充勞工計劃之前，一定要先保障本地工人就業。

波波拒設人數硬指標

發展局局長「波波」陳茂波話估計喺未來幾年，公私營工程一共欠缺一萬至一萬五千個建造業工人，當局爭取喺今年第二季推出優化計劃，但就唔會就人數設下硬指標，亦會有機制確保計劃唔會被濫用。

勞工及福利局局長張建宗亦表示，自舊年四月政府推出優化補充勞工計劃後，當局暫時批准輸入一百七十七名外勞，但同時亦有聘請五十一名本地工人，另外有一宗申請未到勞顧會階段，已被勞工處拒絕，重申勞工處及勞顧會會嚴格把關，認為勞工界要喺理性嘅態度上檢視建造業人手不足嘅問題。

輸入外勞係惹火嘅問題，真係唔知要拗到幾時？