工廈安全隱患多 火災燒出無王管　

件事係咁嘅，觀塘鴻圖道一幢工業大廈其中一個單位日前發生火警，好彩冇搞出人命事故。大家一定會問，火警啫，有乜出奇呀？嗱，成件事奇就奇在，嗰幢工業大廈明明幾近廢棄，照計冇乜人喺入面喇，點知火警發生，多達數十人需要疏散，起火單位竟然係一間韓式汗蒸館添，證明事有蹺蹊喇。消防話喎，調查後發現汗蒸館發熱器過熱引致火警，雖然起火原因無可疑，但舖頭係咪違規改建，就要交畀屋宇署查過至知。

工廈變身汗蒸館得唔得？冇話唔得嘅，但就要申請有關牌照，做足程序先。嗱，根據《商營浴室規例》，任何人經營浴室，包括繳費嘅桑拿服務場所，必須向食環署申領牌照。不過咁，由於韓式汗蒸館毋須浴室，未必會當作經營桑拿浴看待，亦未必受食環署規管。食環署證實，火警單位無持有該署簽發嘅商營浴室牌照，佢哋要跟進情況，先決定係咪採取行動喎。

咁屋宇署又點講呢？佢哋話已派人到上址視察，發現二樓被分間成多個單位，整體結構冇即時危險，至於改動工程係咪違反《建築物條例》，則有待進一步調查咁話。

咁即係點？即係官僚混帳囉。工廈汗蒸館發生火警，係咪無牌經營，係咪非法改建，佢哋竟然一問三不知，一味話跟進調查。以佢哋一貫嘅拖拉作風，就算調查有結果咯喎，蚊都瞓蛇都死喇。

官老爺無所作為，有法不依，唔怪得愈來愈多業主鋌而走險、工廈亂象禁之不絕。講真，今時今日嘅工廈又點止工廈咁簡單吖，簡直包羅萬有，有人改作Band房，有人經營食肆，有人開設酒吧，甚至連寵物殯儀館都有。更得人驚嘅係工廈劏房遍地開花，危機四伏，好似荃灣榮豐工業大廈兩個違規劏房單位咁吖，誇張到劏成廿一間房出租圖利，而法庭竟然只係判罰業主兩萬多元了事，邊有阻嚇力吖。

冇計嘞，港產官僚出名食嘢唔做嘢，胡混度日。講到呢度，太一叮真係好想問吓官老爺，扮盲係咪就等如違規問題不存在呢？萬一再有意外發生，甚至搞出人命，到時先嚟做嘢已經太遲嘞，叮！