城中鏡：方文雄父子兵活化工廈慶功

途經香港會所經常都遇見唔少政商界名人，尋日中午就見到身兼中華總商會副會長嘅協成行董事總經理David方文雄，同兒子方添輝父子檔去食晏。

方添輝（右）返公司幫手，身旁嘅爸爸方文雄梗係全力撐佢啦！

咁高興，原來係因為協成行旗下，歷時三年半打造嘅黃竹坑工廈活化項目Genesis前日終於開幕，而今次正係阿仔方添輝返公司幫手後首個參與嘅大型項目，極具意義，做爸爸嘅David就更加開心喇，所以佢哋兩父子尋日要去食飯慶功喎，亦當係對阿仔嘅鼓勵喇！

廉租兩層助青少創業

David話呢座活化工廈其中兩層會以極優惠租金租畀藝術發展局、東華三院同一個青年團體，協助年輕人創業及提供職訓機會。