城中鏡：有發現：名人談自願醫保 簡松年：啱後生仔
香港專業人士協會尋日舉行午餐座談會，討論自願醫保嘅建議。青年專業聯盟召集人吳傑莊亦有出席，佢話大學畢業後一直有買保險，有次十字韌帶受傷做手術，亦因此輕鬆應付。佢覺得自願醫保幾吸引，但由於對象定喺四十歲以下，佢估計立法會通過後，自己已經唔合資格嘞！
羅少雄（左）同陳東岳對自願醫保都有唔同睇法。
簡松年（左）同陳建強認為自願醫保係輔助性質。
吳傑莊大學畢業後開始買醫療保險。
香港專業人士協會副主席陳東岳亦曾經買過保險，可惜索償過一次之後要續保就貴得驚人，連身為資深產業測量師嘅佢都覺得買唔過，好在斷保後勤做運動同搵營養師指導飲食，健康反而比之前好咗。佢認為自願醫保忽略咗四十歲以上或退休人士嘅需要，希望未來可考慮照顧埋呢班人嘅需要。
「羊毛出自羊身上」
不過，協會會長簡松年同主席陳建強就明白「羊毛出自羊身上」嘅道理，如果想保額大啲，就相對要畀多啲保費。陳建強透露，曾有親人退休後患病，要住公立醫院大房嘅感受，睇住隔籬床一個一個離開承受心理壓力，又唔希望身邊人負擔咁重，所以佢有能力就買足保險。雖然自願醫保只幫到部分人，但覺得一步一步做起好合理。簡松年坦言，自願醫保並唔係一個好全面嘅計劃，只係輔助性質，協助部分較年輕或有能力買保險的人轉投私家醫院作治療，減輕公營醫院壓力，而年紀較大嘅可以繼續喺公立醫院求診。
國際專業保險諮詢協會會長羅少雄就話，如果保費劃一會令保險公司好難做，因為唔同人生活習慣或健康情況可以差好遠，風險亦唔同，覺得政府喺收費設定方面或須再斟酌調整。
