呢排有關回教極端武裝組織伊斯蘭國(IS)大開殺戒嘅消息,震驚世界。起初只針對「敵國」嘅外國人質,近日火頭燒到亞洲,黃皮膚嘅日本人一樣唔放過,被綁架挾持做人質,經常周遊列國之士豈不是好危險?

設計圖片及對白

倡拎殘爆國產手機

足迹遍及過百個國家嘅旅遊作家James項明生,尋日連任香港國際旅遊展嘅旅遊大使,少不免同大家分享吓見聞。見佢一身花碌碌南美民族裝束,佢話件恤衫、披肩加埋條皮帶,全身二十美元搞掂,抵過着名牌,原來示範緊防綁招數。去得龍蛇混雜國家多,佢已曉得入鄉隨俗,每逢去到新地方,佢會拿拿臨買番幾件民族服裝,着上身令街坊睇落順眼啲,亦可作為「保護色」,防綁架好奏效喎。

James又話iPhone喺南美只有富豪先拎得起,拎住部金光閃閃嘅電話,同打開個荷包招搖過市無分別。為低調,佢會改拎殘爆嘅國產手機,至於六至七萬元一部嘅德國名牌相機就更加唔好掛喺身,佢又會袋定哨子,遇到危險,就大力吹BB求救。

用晒以上招數係咪可以避過綁架?佢話總之好過無,當然最穩陣就係呢排少啲去中東國家。

不過,佢就發現日本背囊友都幾勇,多咗人去戰亂國家探險,細問之下,原來當地政府有失業救濟金,所以青年人寧願辭工,拎住每月約一萬港元救濟金環遊世界,遊吓遊吓,去咗IS針對嘅目標地都未定。

講開佔領行動,James無話支持定反對,只係話出面大把世界,青年人眼光唔應該只放眼「亞太區」,即係「亞」皆老街同「太」子道西一帶喎,認真識講笑。

第一手消息請下載on.cc東網iPhone/iPad/Android/Windows Phone Apps