政壇：梁美芬做足功課插盲毛
尋日立法會保安事務委員會召開特別會議，討論本港過去一年嘅治安問題。議員梁美芬就提到佔中發起人之一戴耀廷曾聲言要癱瘓警隊，擾亂社會秩序，但公文袋「阿毛」毛孟靜就話未聽過有關講法。梁美芬於是引用戴耀廷前年接受周刊訪問嘅內容加以印證，仲寸爆話唔怪得有人叫阿毛做「矇查查」嘞！乜啲人唔係叫佢「正盲毛」咩？
梁美芬（圖）連環狙擊毛孟靜，仲寸爆對方「矇查查」。
毛孟靜
睇番當年戴耀廷嘅訪問內容，佢話「第一萬人擠塞警署時，第二個一萬人可以去尖沙咀集結，然後第三批一萬人又可以去沙田堵路」，當時佢嘅講法係「癱瘓警署」，但呢個號召萬人自首嘅諗法確係需要動員大批警力，目的無疑係想癱瘓警隊。雖然阿毛喺會上強調無聽過有人要癱瘓警隊，更要求梁美芬糾正有關講法，但梁美芬今次確實係有備而戰，仲寸爆阿毛講嘢前要做吓功課，或者叫助手查清楚先好講。
發言時間結束後，二人仲喺座位上爭持不下，主席葉國謙後來都忍唔住叫佢哋唔好再嘈。阿毛畀人噴到一面屁，最後喺毫無反擊之力嘅情況下冇癮離場。
