華人置業前主席「大劉」劉鑾雄,因涉及澳門巨貪案而被澳門初級法院判監五年三個月,佢已申請上訴,但仲未排到期。尋日中午大劉如常去到灣仔富豪飯堂用膳,但見佢面容頗為憔悴,頭耷耷之餘不時撳住右腳,行路趷吓趷吓,仲一度要由女兒劉秀融同女友甘比攙扶先落到樓梯,隻腳似乎唔多掂咁喎,唔通擔心單官司所以腳軟軟?

大劉頭耷耷、趷趷吓離開飯堂,落樓梯要由女兒劉秀融攙扶。

手按右腳 上樓辛苦

尋日大劉同甘比一齊坐車去到灣仔富豪飯堂,並由三名保鏢在旁守候。身穿彩色上衣嘅甘比先行落車,戴住眼鏡、面容憔悴嘅大劉則尾隨。我哋見到大劉行路趷吓趷吓,仲不時用手按住隻右腳,上樓梯時仲顯得特別辛苦,但甘比就似乎冇留意到,自己一支箭咁標入飯堂。過咗十分鐘左右,大劉女兒劉秀融玩住手機咁行入飯堂,同佢哋會合。

要女友同阿女扶住

三人連同秘書大概用咗兩個鐘食飯,喺兩點零鐘一齊離開。雖然大劉坐咗一段時間,但腳痛嘅情況並未有改善,佢落樓梯時一度要蹺住阿女手臂,甘比見狀隨即喺旁邊扶住佢。

大劉上車時亦好吃力,要慢慢將個身移入車廂,期間阿女一直陪伴在旁,之後上另一架車離開。

第一手消息請下載on.cc東網iPhone/iPad/Android/Windows Phone Apps