政壇：倒曾小英雄 區選攻泛民
有句說話「盲拳打死老師傅」，呢種情況喺區議會選舉出現一啲都唔出奇。好似建仔咁，年底選舉就計劃派出大量年輕精兵強攻泛民主派地盤。其中一位90後年輕人李佳斌，就積極考慮去葵青葵涌邨中選區挑戰街工主將黃潤達。雖然呢場硬仗誰勝誰負就無人知，但咪睇小李佳斌年紀輕輕，佢讀緊中學時已曾經喺一個論壇上狙擊時任特首嘅「貪曾」曾蔭權爵士，仲贏得「倒曾小英雄」外號，當年佢話志願想做特首，估唔到現時已打算成為區議員，距離理想又近咗一步。
設計圖片及對白
係黃之鋒公大同學
李佳斌今年五月先夠二十一歲，讀緊公開大學政治及公共行政學系一年級，同學民思潮召集人黃之鋒係同學仔，但兩人從未見過面，似乎公大政政呢個學科，真係專出政治人才喎。李佳斌作為一個學生哥，今次一出選就即刻諗住「打大佬」，挑戰街工核心主將黃潤達，睇嚟佢嘅野心都唔小。
不過咁，區議會選舉從來都唔係鬥名氣同鬥政見，而係鬥勤力鬥細心，所以後生仔未必打定輸數，過往都曾經有例子係初生之犢不畏虎，不過慘敗後遭黨拋棄嘅例子都有唔少，到底小英雄前路會係點，就要靠佢自己喇！
講番當年佢點解有「倒曾小英雄」呢個朵，話說佢喺一一年仲讀緊中五，當年佢出席一個青年領袖論壇時，本來想直接向貪曾表達意見，例如香港貧富懸殊有幾嚴重，教育制度有幾唔掂等。點知貪曾轉個頭就雞咁腳走人，好彩李佳斌靈機一觸，轉向同場嘅時任港鐵主席錢果豐發炮，質問佢身為港鐵一哥，到底一年內試過幾多次同打工仔一齊逼地鐵，然後再狠批一眾香港領導人係「何不食肉糜」，成功贏得台下熱烈掌聲。
