公屋輪候排長龍 房會新制惹不公
香港居不易，尤其係來自基層嘅年輕人，想有間自己嘅房屋仲難過登天。嗱，私人樓價愈來愈高，公屋供應又嚴重短缺，安居樂業已經成為遙不可及嘅夢想。
由於公屋輪候人龍愈來愈長，當中唔少係年輕單身一族，房委會下月一日起修訂非長者單身人士配額計分制，輪候者年齡加分由每年三分加到九分，四十五歲或以上可獲一次過加六十分，另外輪候五年而未來兩年未達審查階段嘅申請者需接受查核。當局指新計分制係為咗減低「鬥早」申請嘅誘因，其實真正目的無非想令年輕一族知難而退。
即係咁，好鋼用於刀刃上，當局將公屋資源優先分配畀年紀大嘅申請者，係無可厚非嘅，但變相將年輕一族「墊底」，難免引人質疑，正如有打算申請公屋嘅大學生話齋，新措施對年輕人唔公平咯。咁又係吖，公屋供應量得咁多，當局優先照顧年紀大嘅申請者，年輕人嘅機會自然少咗，點可能會有公平吖。
房委會資料顯示，目前公屋輪候冊人數已超過二十六萬，非長者單身人士佔超過一半，當中近七成係三十五歲或以下，三成幾係冇入息嘅學生添。輪候冊逼爆，話就話係因為有呢啲「水分」，但呢啲水分正正反映年輕人對住房需求殷切，當局斬腳趾避沙蟲，唔止解決唔到問題，反而引起年輕人反感，製造新嘅矛盾，簡直弄巧成拙。
冇錯，公屋作為社會福利，主要用於照顧弱勢階層，年輕人有手有腳，本來應該自食其力，尤其係大學生，更加唔需要依賴公屋，弊在房屋問題不斷惡化，私人樓價及租金長升長有，年輕人望樓興嘆，唔申請公屋仲有乜嘢辦法吖？唔通又要住劏房？
呢，新一期居屋只有二千一百幾個單位，結果收咗近十三萬份申請，超額認購近五十九倍，其中白表佔咗十一萬七千幾份，等於一百三十六人爭奪一個單位，同中六合彩冇乜分別。你話嘞，年輕人點可能唔申請公屋呢。
悠悠萬事，民生為大，民生之中，房事最大。香港問題千頭萬緒，房屋問題更加成為民怨焦點，當局唔諗辦法增加供應，無論房委會出乜嘢招數，點樣計分，都係嘥氣。咪話太一叮唔提醒吖，家陣好多年輕人不滿現實，如果連安居樂業都做唔到，盞將更多人逼上街頭嘅咋，叮！
