政壇：搞搞政：廠商會倡節儉減飲茅台
中央打貪，嚴禁公款吃喝，以致內地都少咗豪飲豪食，連國酒茅台銷情都受影響。中華廠商聯合會（廠商會）過去逢晚宴必有茅台，可以話係茅台酒嘅大客，每年閒閒哋飲咗幾十萬元茅台落肚。
設計圖片及對白
不過，最近聽聞佢哋有新措施，計劃飲晒庫存茅台之後就唔會再入貨，廠商會啱啱由李秀恒接任會長，唔通廠商會亦響應中央嘅節儉之風？
公款買酒宜慎重
廠商會中人過去幾乎無茅台不歡，聽聞佢哋一次飲宴閒閒哋開幾支茅台，大型飲宴就飲十幾支，甚至幾十支。近年茅台價格愈跌愈有，跌到依家都仲要成千蚊一支，一次晚宴分分鐘成萬蚊茅台酒落肚。正因為咁，好多唔飲酒嘅商會中人就有微言，因為廠商會係用公款買茅台，應該慎重啲。所以，廠商會以後唔會再入貨，但就唔反對有人自備或以私人贊助方式提供茅台喎。
商界人士應酬多，飲酒助興亦係常事，不過，天下靚酒何其多，獨沽一味反而有局限。睇怕廠商會行咗新措施後，國酒茅台喺香港又會少一個大客喇。
