佔領行動期間日日見傳媒的「四點鐘許Sir」深入民心，亦令警察公共關係科總警司許鎮德（許Sir）一炮而紅，佢尋日朝早西裝骨骨現身黃竹坑警察學院出席學警結業典禮。講起警隊計劃喺facebook開設官方專頁，許Sir顯得好頭痕，會唔會用許Sir相片作為專頁頭像博人讚好？佢即刻耍手擰頭話警隊重視團隊而非個人。

許鎮德（許Sir）

許Sir話，個專頁將走年輕路線，初步計劃開放留言功能畀網民回應，亦會請專人打理同埋回覆網民，如果反應好嘅話，會請人二十四小時跟進添。不過籌備需時，預計今年上半年都未必開到喎！佔領行動後，警民關係一度緊張，警隊諗到用時下年輕人常用嘅社交網站同市民溝通，都係件好事，如果用多啲圖片同影片吸引更多人睇，發布嘅資訊又盡量精簡，相信到時唔怕冇粉絲嘅。

第一手消息請下載on.cc東網iPhone/iPad/Android/Windows Phone Apps