勞工及福利局局長張建宗花名叫肥仔張，佢嘅身形係點大家有眼睇喇！不過，尋日佢出席一個活動時，着西裝皮鞋當眾大跳健康操，睇落都幾得意。

張建宗尋日西裝革履同參加者一齊跳健康操。

肥仔張尋日係出席一個推廣精神健康嘅活動，當時一眾嘉賓要齊齊拎住條長巾做健康操，做主禮嘉賓嘅佢着住成套西裝同皮鞋，上台做體操，擺明服裝唔啱嘅嘞，不過，肥仔張冇所謂，照跟大隊，只係大家齊齊做金雞獨立嘅動作時，佢似乎隻腳唔夠力，以致身體有啲唔平衡，加上雙手拉扯住長巾，造型真係夠獨特。

第一手消息請下載on.cc東網iPhone/iPad/Android/Windows Phone Apps