政壇：吳得掂呻掌教局易惹火
近排內地及香港都有唔少人討論港獨之風，批評香港教育出咗問題，更有人指摘本港青少年唔修讀歷史，成無根一代。教育局局長吳克儉尋日出席一個電台節目時，好無奈咁呻，無論喺何地，只要係涉及教育嘅問題，教育局局長好多時候都會被點名。佢呢句說話真係可圈可點，似乎係想講教育局局長個位易惹火，被點名未必代表佢做得差呢？
設計圖片及對白
早前全國港澳研究會會長陳佐洱點吳得掂嘅名，指出香港嘅新一代教育工作需要加強，又認為教育局局長應該重視青少年嘅愛國教育工作，吳得掂昨在電台回應時話，作為問責局長，佢會虛心聆聽外間嘅意見，但都忍唔住爆咗「易被點名論」。究竟佢咁講係咪卸膊呢？雖然教育涉及好多瓣數，但其他十二個政策局局長亦一樣噃，絕唔係教育局局長獨有啫，更何況，吳得掂捱批並唔係單純一件事。
力挺姊妹校青少年軍
呢輪港獨之風狂吹，大家討論時難免重提國民教育被推倒嘅事，唔好忘記，呢件亦係吳得掂上任以來搞喎嘅大事，政績欠奉、外訪安排卻多多，結果連立法會建制派議員都感不滿，狙擊埋一份，所以話，吳得掂真係要好好研究吓被點名嘅原因。
另外，佢喺電台節目中又講到本港學校同內地學校結成「姊妹校」一事，話呢個計劃並非新項目，亦唔係針對某些事件而設，只係畀學校方面更多聯繫、更多交流，至於香港青少年軍，佢認為可以培養參加者自律，有正確價值觀，值得鼓勵，談到中聯辦主任張曉明擔任該會榮譽贊助人，吳得掂唔認同係內地插手香港事務，仲反問張曉明支持有關團體有乜嘢唔妥？佢強調，張曉明唔會參與團體運作，只係提供意見，希望港人及家長可以客觀對待。
