政治爭拗不宜居 香港斯人獨憔悴

唔係杞人憂天o架。有國際機構調查發現，喺全球適宜居住城市排名中，香港由舊年第十七位暴跌至今年第三十三位，畀全球第一嘅老對手新加坡愈拋愈遠。調查指新加坡生活環境比較好，吸引唔少公司到當地設立分部，反觀香港，雖然教育同醫療配套唔錯，弊在空氣質素比其他亞洲地區惡劣，加上政治同社會分化惡化，所以排名急跌。調查機構仲講到明，香港政治唔穩定嘅情況好難改善，未來一兩年排名不容樂觀。

正所謂，唔怕唔識貨，最怕貨比貨。新加坡全心全意謀發展，香港就全心全意搞政治，一味內耗，正經嘢完全冇人理，以致競爭力不進反退，排名想唔跌都幾難。尤其係一場佔領之亂，更加令香港烏煙瘴氣，七國咁亂，唔輸畀新加坡九條街至奇喇。

今日香港只問立場，不問是非，反對派開口民主，閉口公義，實際上係順我者昌，逆我者亡，搞到有人忍唔住炮轟，話香港從未試過好似今日咁，是非顛倒，黑白混淆。

冇錯嘞，佔領之亂就好似當年內地嘅文革咁，幾乎令香港萬劫不復。有政客高喊「沒有民主就沒有民生」，講到好似只要有「真普選」就一天光晒咁，其實根本係自己呃自己。好似台灣咁，以前埋首發展經濟，同香港並列「亞洲四小龍」，點知引入所謂「民主」後，成個社會愈來愈政治化，日日家嘈屋閉，經濟反而停滯不前。即使英美等老牌民主國家，近年都反思過分強調民主係咪會令效率低下。所以話，香港繼續沉迷政治鬥爭，遲早自己玩死自己。

講開又講，香港社會愈來愈政治化，固然令人走夾唔抖，樓價高處未算高，更加令人望而生畏。你話嘞，連安居樂業都成為遙不可及嘅夢想，仲講咩「宜居」吖。仲有呀，香港空氣質素出名惡劣，想望吓個藍天都難，唔少跨國公司員工知道要被派駐香港，無不耍手擰頭。呢，一年一度嘅國際馬拉松就嚟開跑，跑手又要被迫做人肉吸塵機喇！

始終都係嗰句，民主唔係萬應靈丹，政治更加唔可以當飯食，如果香港再唔改弦易轍，行番正道，前面只有死路一條嘅咋，叮！