城中鏡：李小加 張華峰「世紀飯局」破冰

不過，呢個地球係圓嘅，事隔差唔多兩年，兩人終於「破冰」，張華峰尋晚安排十個金融業界組織同小加總裁「世紀飯局」，係上次飯局不歡而散以來嘅首次。

尋晚呢場「大龍鳳」當然係大陣仗，差唔多有成四十人出席。飯局設有兩大主題，第一係港交所有乜方法協助本地券商尋找商機同減低經營成本，第二當然係飯局「重頭戲」，就係本地券商對港交所重推收市競價時段同市調機制（又稱漲跌停板制）嘅初步睇法。

自港交所上周五公布諮詢文件以嚟，除咗中小經紀反對收市競價係「指定動作」外，亦不斷有聲音反對市調機制，但港交所今次對推行兩制似乎係「勢在必行」，自然想搞掂班中小經紀。

張華峰話業界普遍接受市調機制，事關若股價突然Chok上Chok落，有冷靜期係好事。仲話對比內地市場漲跌百分之十停板係全日，香港五分鐘就開番，已經好咗好多。至於收市競價，佢就話業界反而未有一致意見，重申「只要能說服到我，機制係唔會畀人操縱到，我係唔會阻住個地球轉。」張華峰喺飯局之前釋出咁大善意，睇嚟呢場破冰飯局，都唔會係食之無味。