坊間盛傳係創新及科技局局長熱門人選嘅理工大學行政副校長楊偉雄，尋日出席學校活動時繼續成為追訪焦點，但佢就耍手擰頭唔肯透露半句同政府有關嘅嘢。問佢係咪準備返新工時，都依然封口，唔通佢擔心創科局會臨尾甩轆，所以唔敢咁老定？雖然楊偉雄咁口密，但遇啱尋日活動係講「社會創新及創業發展基金」，佢上到台就大讚特首剛發表嘅《施政報告》有提及青少年流動同科技發展，真係同政府啱晒嘴形。

楊偉雄（左）尋日耍手擰頭唔肯透露半句同政府有關嘅嘢。

政府日前突然調動議程，希望立法會財務委員會盡快通過成立創科局嘅撥款申請，而聽聞「死線」係二月十四日，即係情人節當天，若果過唔到嘅話，二十五號發表嘅財政預算案就唔可以包括創科局新加嘅財政預算，換言之創科局所有程序都要從頭開始，而據聞財委會亦想盡快通過相關撥款，令醞釀多年嘅創科局終於有機會「出世」。

第一手消息請下載on.cc東網iPhone/iPad/Android/Windows Phone Apps