城中鏡：實習磨練信任 啟剛無悔斟茶打雜
依家社會競爭激烈，想搵到一份好工，首先要好好裝備自己。含住金鎖匙出世嘅香港青年聯會主席霍啟剛雖然唔使由低做起，但喺實習時就試過做斟茶遞水同影印等工作，青聯副主席兼城中名人許晉亨外甥Andy郭永亮亦喺實習時入過冷藏庫內點貨，結果因為太凍，每隔十幾分鐘就要行出去一次，十分之難忘。
霍啟剛（左）實習時試過斟茶遞水，右為其弟霍啟山。
郭永亮實習時難得有機會入冷藏房及印刷廠。
陳詠娸（左）同葉振都因實習而磨練出良好工作態度。
尋日香港青聯學生交流網絡舉辦「共創新系列」暑期實習計劃資料簡介會，一眾青聯骨幹都有到場，眾人講起實習歷練都有一本難唸嘅經。啟剛坦言，無論做邊一個行業都要由低做起，年輕人唔好覺得做呢啲冇用，因為僱主往往就由呢啲地方開始建立對你嘅信任。Andy就話實習時見識到好多平時冇乜機會去嘅地方，除咗試過喺冷藏庫入面點貨之外，又試過去印刷廠，先知用來印書嘅紙係成個人咁大卷。
陳詠賣冰條被客鬧喊
青聯副秘書長Vincenza陳詠娸回想仲讀緊書嘅時候，去咗一間食品公司實習幫手籌備美食博覽，當時公司推出一款椰汁冰條大受歡迎，市民大排長龍，點知有個人排咗成個鐘後咁啱賣晒買唔到，當場對住佢破口大罵，嚇到初出茅廬嘅Vincenza忍唔住喊。佢話呢個經驗令佢處事更加成熟。
青聯首席參事葉振都亦有到場，佢話依家嘅學生好幸福，皆因學校或團體會幫手搭路搵機會。想當年佢喺英國讀書嘅時候，靠自己搵咗五、六間公司先至成功搵到實習機會喎。
