政壇：搞搞政：議員爭捉鬼為流會卸責
立法會前日召開今年第二次大會，再次因法定人數不足而流會，但由於今次流會唔係死於「拉布」喎。當時會議廳內得三十三名議員，建制派連同曾鈺成在內有二十四人，泛民主派就得番九人，工黨同公文袋只得兩個人在座，白鴿黨更加唔見影，可以睇到議員對開會有幾重視，立會應該加個外號叫「流會樂園」。
設計圖片及對白
前晚八點幾鐘，立會開始討論由保險界議員陳健波動議嘅「打擊保險詐騙活動」議案，當財經及庫務局副局長劉怡翔發言完畢，主席曾鈺成就宣布進入表決環節。不過，由於建制派反對工黨李卓人嘅修正案，阿人要求進行記名表決。由於五分鐘後都未夠法定人數，主席就叫秘書響鐘傳召議員，即使新民黨田北辰連飯都唔食喺最後四十秒匆匆跑入會議廳，但仍然做唔到白武士，最後流會收場。
今次流會死因，當然個個都話唔關自己事啦！工聯會黃國健質疑流會係拜曾鈺成所賜，話唔少議員諗住要等到翌日先可投票，唔少議員都提前少少離開，批評主席無視議會常規堅持表決。有議員就為主席平反，質疑財庫局官員唔想第二日再去立會呆坐，所以先叫主席喺當晚完成表決，但財庫局中人就大呼冤枉，聲言絕對無暗中向主席或秘書處施壓。
有提早「偷走」嘅泛民議員就倒戈，質疑阿人事前唔喺飯盒會「單聲」話會要求記名表決，而喺議案表決前又唔提佢哋要留多一陣，令佢哋大安旨意咁以為唔使投票。咁都有得賴！
不過去咗哈爾濱開會嘅鍾樹根就形容今次流會係天意，事關流會令公文袋「阿毛」毛孟靜提出有關壹傳媒被掟汽油彈事件同新聞自由關係嘅休會待續，要延至下星期先可提出，到時佢已返港，可以鬧爆阿毛喎。
