政壇：葉建源立會大樓打邊爐
早前佔鐘糾察隊長郭紹傑喺立法會示威區內用明火「打邊爐」，被秘書處公開批評行為有違立法會規定。不過，言猶在耳，教育界議員葉建源尋日竟然同三位議員助理喺大樓九樓茶水間用電磁爐打邊爐，擺明就當立法會規定透明。葉建源作為教育界代表明知故犯，唔知佢擔唔擔心會教壞細路呢？
葉建源被發現與助理喺立法會大樓茶水間打邊爐。（資料圖片）
我哋收到投訴，尋日下午十二點幾鐘，有泛民議員助理喺九樓其中一個較大嘅茶水間打邊爐，保安人員迅即趕到現場巡視，並勸喻對方唔好喺茶水間打邊爐。初時有人以為違規分子係白鴿黨議員助理，但該黨發言人澄清佢哋助理當時只係喺寫字樓內食飯盒，並無去茶水間打邊爐。後來有人報料，涉事者其實係葉建源同其助理，我哋打過畀葉建源問係咪真有其事，但截至截稿前未有回覆。
秘書處回覆話，根據立法會辦事處指引，議員辦公室所有房間嚴禁煮食，連用電磁爐都唔得，又話秘書處巡查時發現有一名議員同三名議員助理喺茶水間內打邊爐，當時已即時作出勸喻。
