政壇：星星籲減廢力推手巾仔

堆填區總廢物量當中有四成係廚餘，政府於是設計咗「大嘥鬼」幫手呼籲市民「惜食」。環境局局長「星星」黃錦星尋日喺電台節目主動提到，香港嘅廢紙同廢膠各佔堆填區總廢物量兩成，而廢紙當中竟然有一半屬於紙巾類，對堆填區造成壓力，佢呼籲市民出街記得帶手巾仔，唔好用咁多紙巾喎。

星星又話今年四月一日會將膠袋徵費擴展至買報紙、買書同買衫等零售點，雖然買麵包未列入規管範圍，但佢都呼籲市民學佢咁，買麵包帶個盒去盛載，可以慳番好多不必要嘅廢膠袋。

另外，星星話當局計劃喺上半年就規管電力市場展開公眾諮詢，當中涉及電力價格、穩定性、安全同環保四大因素，由於有關議題複雜，當局收集民意後會與兩電商討，期望在現屆政府任期內，與兩電達成共識。