經過佔領行動一役後,除咗網民,一批年輕專業人士亦有意喺年底參選區議會,靠網絡動員吸納「首投族」(首次投票的選民)支持,更點名劍指「雙料議員」葉國謙、梁美芬同「三料議員」李慧琼添!被挑機嘅梁美芬不但毫無懼色,仲話好想同呢班「前佔領者」對話,終極目標係將佢哋收歸建制派陣營喎,認真雄心壯志。

設計圖片及對白

冀糾正錯誤歷史觀

早前我哋報道過有網民考慮挑戰惹火建制派人物,好似位處西營盤中方敏感地帶嘅中西區區議員盧懿杏、靠佔旺禁制令成功發圍嘅黃大仙區議員陳曼琪等,遇着呢班自稱高質素嘅後生仔參政,部分老將似乎未驚過,仲話以平常心對待,出得嚟行都預咗有人挑戰。

另一目標梁美芬就話,好歡迎後生仔同佢打番場選戰,自言身兼大學副教授,好樂意同年輕人對話,希望糾正到年輕人對於「本土」、「港獨」嘅錯誤歷史觀,長遠計唔好再狙擊佢,甚至成為自己嘅支持者添!梁美芬想變招,靠向對手挖角未免太冒險喇,如果有效嘅話,政府亦唔使咁頭痕,如果搞得掂,青年事務委員會主席畀你做又點話?

講開「雙學」領袖彈出,催生年輕人參選甚至從政,促成泛民陣營「換血」潮,相反建制派就極速衰老,第二梯隊能夠獨當一面嘅寥寥可數,更莫講話建制版周永康、黃之鋒喇。據知建制派正積極透過網絡力量吸納年輕建制支持者,以抗衡泛民新勢力,但觀乎唔少建制派議員仍然只係識得利用社交網站「打卡」交代落區情況,年輕人點會有興趣睇呢?建制派要喺新世代發圍真係要再諗諗計。

第一手消息請下載on.cc東網iPhone/iPad/Android/Windows Phone Apps