隻手遮天能幾時 郵政醜聞天下知

即係咁，東方報業舊年十月三十日收到一封已寄出兩個月、疑因地址有誤而被退回嘅公文袋郵件，公文袋被人拆開，內藏九封同日寄出嘅郵件，其中一封更被開封後再以膠紙封口，簡直匪夷所思。東方報業立即向香港郵政投訴，同時報警處理，香港郵政可能知衰啩，急急派人來報館「調查」，又書面承認事件「極不尋常」，並且「未有按正常程序分流及喺隨後嘅郵件處理流程中出現問題」，但就冇合理交代，甚至連道歉都冇句，淨係話已交由警方調查，不宜披露內部調查嘅具體內容喎。

嗱，呢啲咪叫狡辯囉。一句交畀警方調查，就關人個關，香港郵政擺明耍太極喇。正如有立法會議員話齋，今次事件涉及傳媒機構，性質嚴重，亦反映郵政管理存在漏洞，香港郵政必須作出明確交代，家陣石沉大海，無晒下文，你估唔係想玩拖字訣，拖到件事不了了之咩。有議員就批評，香港郵政拒絕公開內部調查進度及結果，有如部門利益凌駕一切，揚言會繼續喺立法會跟進，絕唔容許有人瞞天過海，蒙混過關。

冇錯嘞，香港郵政作為政府部門，居然爆出涉嫌違法滋擾傳媒醜聞，簡直無法無天，絕對唔能夠就咁不了了之o架。咪話太一叮唔提醒吖，廉署查「雙貪案」查到無影無蹤，香港嘅廉政與法治招牌已經岌岌可危，如果香港郵政所謂嘅內部調查又演變成另一齣官官相護嘅鬧劇，施政報告嗰句「重法治」唔該揼落鹹水海喇！

冇計喇，香港郵政醜聞多多，可能覺得多一單唔多，所以咪自甘墮落囉。講真，如果佢哋真心認錯，至少應該道歉喇，連一句對唔住都慳番，證明佢哋冥頑不靈，擇惡固執。

話時話，香港真係愈嚟愈烏煙瘴氣，愈嚟愈光怪陸離。淫賤黎出晒名反中亂港，喺佔領行動中更加赤膊上陣，搞風搞雨，唯恐天下不亂，但係港府對佢不知幾咁愛護有加，居然搞出「預約拘捕」嘅笑話，而且被佢踢保添，你話唔係撞邪都唔得喇。反中淫媒受呵護，正義傳媒被打壓，港府忠奸不分，黑白顛倒，香港仲點會有運行吖，叮！