瑞士央行上周宣布取消歐元兌瑞士法郎嘅最低匯率限制,令瑞士法郎大幅升值,對本地鐘錶界亦有影響。香港工業總會主席兼運年錶業集團董事總經理Stanley劉展灝話,瑞士日內瓦本周有個大型鐘錶展覽,佢會飛去當地了解兼且同其他大型鐘錶品牌商討對策。

劉展灝話本周去完日內瓦大型鐘錶展覽後,會更清楚嚟緊鐘錶價格加幅。

Stanley話早前瑞士央行講過唔會同歐元脫鈎,所以今次可以話令佢哋措手不及,除咗對鐘錶價格有影響之外,當地旅遊業同出口都會大受打擊。

雖然因為匯率影響而令瑞士鐘錶入口價大幅上升,但佢估計唔少大品牌亦會擔心影響銷售而下調價格,而廠商、零售商會分擔上升成本。佢話始終過去一年鐘錶業同奢侈品銷情一般,如果將大部分加幅轉嫁畀消費者,擔心會令生意雪上加霜。

第一手消息請下載on.cc東網iPhone/iPad/Android/Windows Phone Apps