城中鏡：馬雲出席論壇如廁都唔得閒
備受關注嘅世界經濟論壇年會，喺瑞士達沃斯正式展開。相隔七年再次出席年會嘅阿里巴巴集團主席馬雲，自然成為各路傳媒約訪目標，不過對Schedule（日程）早已排得密密麻麻嘅巨企老總嚟講，要抽空接受訪問幾乎係不可能任務，有人甚至猜測馬雲喺達沃斯就連去廁所，都可能要睇日程。
有人猜測馬雲喺達沃斯就連去廁所，都可能要睇日程。（資料圖片）
聽隨行嘅阿里相關人士講，馬雲忙到連去廁所都要排Schedule確可能有啲誇張。但單睇馬雲喺跟隨總理李克強飛往瑞士前嘅一日，仍然喺杭州親自接待到訪阿里同螞蟻金服嘅中央官員，足見馬雲講得上係風塵僕僕，部分活動日程緊迫到只有三分鐘確係唔出奇。
入股以色列科企
馬雲對上一次到達沃斯出席世界經濟論壇已經係○七年嘅事，期間馬雲同阿里一同經歷B2B業務在港上市同私有化、回購雅虎持股再到美國掛牌。馬雲今次喺達沃斯已成為國家代表級企業嘅領軍人物，其受重視嘅程度與○七年已不可同日而語。
講開阿里近日可謂動作多多，阿里日前入股以色列科技企業視覺碼（Visualead），據報涉資或達一千萬美元。其關聯的支付寶又傳出將加入聊天功能，實行要同騰訊嘅微信全面交鋒。馬雲這位世界級嘅企業主管，肯定繼續忙到透唔過氣。
