政壇：搞搞政：拉布阻設創科局 慢必殃及池「漁」
日前政府突然宣布撤回立法會財務委員會首四項議程，聽日會直接審議原本排喺較後嘅漁業貸款同創新及科技局撥款申請。財委會主席張宇人尋日話，由於大會之前通過嘅決議案列明係喺一四/一五年度內成立創科局，如果財委會唔可以喺二月十四號、即情人節之前通過相關撥款申請，二十五號發表嘅財政預算案就唔可以包括創科局新加嘅財政預算，換言之創科局所有程序都要從頭開始。
設計圖片及對白
張宇人話，由於成立創科局呢個議題已喺大會同人事編制小組委員會傾過好多次，加上佢認為創科局嘅迫切性同話題性都唔及三堆一爐，覺得委員會應該唔使討論太耐就可表決。對於有泛民議員表明「拉布」，佢就話會容許議員就議題合理地發問，但唔可以畀人覺得立會議而不決，所以會視乎情況作出合理限制。
人民力量「慢必」陳志全批評當局臨時抽起財委會部分議程嘅做法卑鄙奸茅，表明到時定會以提休會待續同不斷發問等方式「拉布」。對於財委會將喺二月頭同情人節當日加開四節會議，佢話為咗拖長「拉布」時間，佢哋會同泛民其他黨派合作，喺審議漁業貸款撥款申請時開始「拉布」，等財委會遲遲都唔可以進入審議創科局嘅議程，等政府唔可以用快刀斬亂麻嘅方式通過創科局撥款。
咁即係變相殃及池魚。漁農界「高佬賢」何俊賢話為協助喺受禁止拖網捕魚影響嘅漁民，政府早前建議將漁業貸款由二億九千萬元加碼至十一億元。但由於財委會「拉布」拉足半年，已令一班諗住政府打救嘅漁民非常不滿，點知依家泛民又因一己私利而想拖垮漁業貸款，認真離譜。
何俊賢話唔少漁民團體聽日會趁財委會開會到場示威，呼籲泛民議員要高抬貴手，因冤有頭債有主，唔好搵業界利益嚟較飛。
