政壇：范國威拉過氣乳鴿做騷
民陣下月會發起遊行，而新民主同盟立法會議員范國威尋日喺茶敍話，會喺遊行期間向遊行人士派發「我要真普選」同「本土大吉」嘅利是封。為咗幫黨內新人上位，佢仲拉埋兩個由白鴿黨「單雞」單仲偕辦事處過檔嘅社區主任許銳宇同湯子霈出嚟見大家。范國威拉啲過氣乳鴿出嚟做騷之餘，仲要踩白鴿黨「AV仁」何俊仁辭職時間唔理想，又唔預早通知泛民主派，好唔團結喎。
范國威（中）兩邊嘅新黨員都係由白鴿黨過檔。
湯子霈被問到點解要退黨加入新同盟，佢話喺佔領行動後，發覺新同盟嘅政治理念更適合佢，加上白鴿黨喺佔領行動中行得唔夠前。不過，湯子霈當時被指未搞好退黨手續就轉投敵方陣營，被白鴿黨鬧爆佢忘本，湯承認當時喺辦理退黨手續一事上處理得唔夠好，對此感到抱歉。
單雞承認兩人之前係其助理，話尊重兩人過檔決定，又話人各有志，泛民政黨嘅政治版圖咁大，佢唔可以唔畀人退黨另謀高就喎。被問到會否諗計減低員工流失率時，單雞就笑言不語。
