政壇：講高球場用地 波波口窒窒
喺新界西北嘅發展計劃當中，其中一個爭議就係質疑政府點解唔收回粉嶺高爾夫球場，而發展局局長「波波」尋日接受電台訪問時就話政府今年內公布新界北發展初步研究，當中會包括發展粉嶺高爾夫球場，佢仲話聽到好多聲音要求檢討粉嶺高爾夫球場嘅土地運用，畀主持人多番追問幾時會落實，波波口窒窒咁話實際公布時間仍有待確定。咦！波波咪以為噏吓就可以過關，事關反東北發展計劃嘅團體肯定金睛火眼（目及）到實，追到佢瘦。
陳茂波話政府今年內公布新界北發展初步研究，當中會包括發展粉嶺高爾夫球場（圖）。
波波又話，當局今年首季會推出洪水橋第三階段嘅公眾參與計劃，正研究在兩公頃土地興建多層工業大廈，並已物色到一幅土地興建第一幢多層大廈，讓棕地用家搬遷，以騰出土地發展。政府亦會透過增加地積比率，提高住宅單位嘅供應量，政策上總體擬增加兩成，但喺規劃時會考慮各幅土地情況，包括空氣流通等，唔會盲目狂加。
另外，今期居屋至今接獲十一萬二千八百份申請表，超額認購五十一倍。綠表申請共有一萬零九百份，而白表申請則有十萬一千九百份，樂富房委會客務中心仍需處理郵遞及屋邨辦事處接獲嘅申請表。
