政壇：傳內定IT總監 政府捱批
話時話，創新及科技局都未知幾時先至成立，但政府內部一直都有政府資訊科技總監辦公室呢個部門，處理科技有關事宜。總監賴錫璋任期今個月完結，已經走咗人，政府早前決定對外公開招聘，但近期業界有消息傳出，話政府已內定由現時副手林偉喬接任，搞到一班遞咗信申請呢個位嘅IT人罵聲四起，話政府搞咁多嘢都只係走過場，睇嚟開局未成，就先惹來一番爭議。
設計圖片及對白
政府資訊科技總監呢個職位聽落以為係技術官員，實情牽涉唔少政治涵義。大家記憶力好嘅話，賴錫璋點解六十四歲都要上任，就係因為前任總監葛輝嘅離任。政府一一年頭宣布葛輝以「私人理由」辭職，但葛輝就聲稱因為受到政治打壓而辭職，並大爆「上網學習支援計劃」嘅遴選過程有政治任務，搞搞吓警方商業罪案調查科仲介入事件。
留待蘇錦樑拆彈
賴錫璋上任後亦惹來非議，有人質疑佢年紀咁大都要上任，亦有人話佢上任之後，似乎偏向泛民主派，搞到建制派都唔妥佢，但事實係咪咁仍有待證實。儘管乜嘢傳聞都好，賴錫璋任期今個月已完結，政府亦喺去年十一月公開招聘總監一職，聽聞仲吸引咗幾十名申請者，當中包括業界名人。但最近就傳出消息話總監一職已有內定人選，於是搞到一班IT人咁合合囉。呢個茶煲（Trouble），又睇吓商務及經濟發展局Greg蘇錦樑點拆彈嘞？
不過，有政府中人解釋，政府對公開招聘係非常認真，一定會完成整個招聘過程，否則公務員事務局就會出聲。另外，有建制派中人問過，話政府經過初步遴選，會喺下個月開始約見十個八個申請者，所以一班有意做總監嘅IT人就唔使擔心喇！
講開「上網學習支援計劃」，最初獲政府撥款一億元推行計劃嘅互聯網專業協會（iProA），因被揭發帳目混亂，被警方商業罪案調查科調查。我哋都收到消息，話商罪科最近開始打畀涉事人士，話已經結案，唔會作出檢控。警方發言人證實，一三年一月接獲懷疑盜竊報案，商罪科完成調查及徵詢法律意見後，沒有足夠證據起訴。
