三十年河東，三十年河西。家陣嘅香港，莫講話經濟發展比唔上內地，就算過去最令港人引以為傲嘅廉政及法治，一樣危危乎。大家有眼見o架，內地大老虎打完一隻又一隻，本港腐敗老鼠就一味被放生，仲夠膽話香港係法治之區喎，簡直係笑話。

冇錯嘞，講緊嘅之唔係「貪遍省港澳、歎盡海陸空」嘅前特首曾蔭權爵士囉。佢自從被本報踢爆連串貪腐醜聞後，唔止淪為過街老鼠，仲觸發前所未見嘅舉報潮，成為本港開埠以來第一位被廉署立案調查嘅政府一號人物。但奇怪嘅係，案發接近三年嘞，廉署查來查去仲係得個吉，貪曾依然逍遙法外，問你服未！

點解貪曾案石沉大海？有消息指當局鑑於本港面對政治亂局，一舉一動都受到世界注意，為免亂上加亂，極有可能放生貪曾喎。咁都得？貪曾以權謀私，同富豪勾勾搭搭，罪證確鑿，咁都可以被放生，仲成世界嘅？此例一開，咪即係話畀人知，只要官位夠高，靠山夠硬，大貪特貪都冇問題，咁仲唔係變相鼓勵貪腐？

講起就羞家，香港自詡法治社會，開口埋口法律面前人人平等，原來係大隻講。大家應該仲記得，帶住「金鷹」賣藥嘅陳伯曾被漁護署控告，「金鷹」仲一度被法庭充公添。仲有呀，有隧道公司職員因為執咗一蚊，唔止冇咗份工，仲被告上法庭添。所以話，竊鈎者誅，竊國者侯，就係今時今日香港嘅寫照嘞。

講開又講，當局放生貪曾嘅理由，簡直九唔搭八。正因為本港面對政治亂局，更加需要撥亂反正，以儆效尤，點可以放生貪官o架。好似立法會議員話齋，香港係法治之區，必須依法辦事，唔可以因為一個人嘅身份及地位而有所偏袒o架。咁又係呀，王子犯法，與庶民同罪，睇吓台灣阿扁就知喇，就算係堂堂前總統都冇情講，何況貪曾只係一個過氣特首咋，點可能例外吖！

話時話，有調查指本港多達六成半年輕人認為貪污問題日益嚴重，認為港府唔聽民意嘅比率亦持續上升，當局其身不正，難怪年輕人個個反政府喇。其實市民嘅訴求好簡單，就係要求港府依法辦事，盡快將貪曾落鑊，擦亮廉潔招牌。正如內地領導人話齋，「反腐不封頂」，唔理係邊個，職位高定低，只要觸犯法律，就要依法嚴懲。嗱，內地打老虎絕不手軟，港府收到未吖？叮！

第一手消息請下載on.cc東網iPhone/iPad/Android/Windows Phone Apps