城中鏡：遊西雙版納 陳恒鑌克服畏高
每逢放長假，好多立法會議員都會爭取同家人共聚或外遊，但議員Ben陳恒鑌就趁聖誕同新年長假期，抽時間同黨內兄弟去咗雲南省西雙版納旅行，參觀當地嘅原始森林。佢話森林入面全部都係近百米高、屬於稀有植物品種嘅望天樹，外形非常壯觀。
陳恒鑌（中）去西雙版納參觀原始森林，順便克服困擾多年嘅畏高症。
穿梭空中繩橋賞樹
西雙版納有中國唯一嘅熱帶雨林自然保護區，當地氣候溫暖潮濕，森林內住滿孔雀、亞洲象、犀鳥等珍禽異獸。阿Ben話由於森林內無車坐，佢哋要靠有成幾十米高嘅空中繩索橋代步，先可以穿梭森林之間，細心欣賞美景。
不過，阿Ben本身患有畏高症，所以初時佢都唔敢行過條繩索橋，但為免自己耽誤團友行程，其他兄弟幾乎要夾手夾腳抬佢過橋。最終阿Ben不負眾望成功行過繩索橋，仲克服埋困擾多年嘅畏高症，佢話感覺就好似兩年前贏咗立法會選舉咁開心喎。
