政壇：搞搞政：倡民選區議員任提委 建制獻計恐煲無米粥
早前包括政制及內地事務局局長譚志源在內嘅政改三人組，啟動政改第二輪諮詢，但泛民主派堅持杯葛，中間溫和派亦唔見有拋出好建議，到底點樣可以打破僵局呢？一千二百名提委會成員由四大界別組成，而第四界別屬於「政界」，由立法會議員、政協、人大、鄉議局、宗教界同全港區議員共同組成，而當中一百二十多席由「港九各區議會」、「新界各區議會」組成，但可惜現時只由區議員互選產生，民意認受性令人質疑。
設計圖片及對白
有建制派人士唔忍心眼白白睇住政改被否決，所以建議容許全港選民選出百多名區議員做提委會成員，等提委會選民基礎大增，增加提委會認受性。
泛民不合作難落實
事實上，呢個方案唔算係「公民提名」，亦符合全國人大常委會「八三一」決定及《基本法》，法理上係完全無問題，而且仲令到提委會符合「廣泛代表性」。不過，倡議者只係擔心，現時有無足夠「政治空間」去容納呢個方案。
據聞呢個方案係一群人集體智慧諗出來，但為免方案「見光死」，佢哋無大鑼大鼓周圍同人講，只係低調向政府提交咗呢個新方案，政府聽到後都覺得有新意，但由於之前無乜人從呢個方向提出過，政府一時之間都唔敢否定或肯定，只係一貫回應話可以研究。
講到底，任何方案唔係要過政府嗰關，而係過北京嗰關，但北京似乎未到最後關頭，都唔會作出任何定奪。就算北京首肯，都要泛民肯「顧全大局」支持方案，如果下下都要一步到位，等於傾乜都無用，最後淪為無米粥。睇怕要過多幾個月，去到最後埋枱談判階段，先知呢個方案有冇機會落實。
