政壇：傳小米雷軍拒絕fb入股
小米上年頻頻撲水集資，但有消息就傳出，話早喺小米完成咗十一億美元嘅融資前，全球社交網站一哥Facebook（fb）就有意同小米合作，但小米嘅CEO雷軍竟然不為所動，拒絕咗呢一個大好良機。
有消息話朱克伯格同雷軍（圖）曾喺北京傾密偈入股小米，但雷軍拒絕咗。（資料圖片）
朱克伯格（資料圖片）
話說上年年中，fb嘅創辦人「朱仔」朱克伯格去咗北京出席私人聚會時，有消息就指當時朱仔其實秘密搵咗雷軍傾密偈，想入股小米咁話喎，只不過當其時雷軍就擰晒頭，拒絕咗呢條大水喉。
否認怕得罪Google
幾多公司想fb入股都冇咁嘅機會呀！而雷軍竟然唔要同fb合作，寧願自己搞集資，令到好多人都好訝異。但心清水嘅各位就會知道，據講因為fb一直想進軍內地，但小米卻希望衝出國際，何況fb家陣喺內地仍在被禁之列，恐怕呢個係雷軍拒絕朱仔其中一個原因。
再講如果小米同fb合作，分分鐘得罪Google呢個重要partner，話晒小米手機都用緊Android平台吖嘛！雖然小米合夥人林斌即刻喺微博否認，話「從來沒有所謂拒絕投資，怕得罪Google的事情發生。」雖然小米同fb無緣，但雷軍就對小米前途滿有信心，仲話打算未來五至十年內，小米智能手機有望成為世界第一咁話。
