為咗配合早前嘅佔領行動，泛民主派喺立法會搞不合作運動，成功取得工務小組同人事編制兩個小組委員會嘅控制權，建制派原本打算申請逾期加入補飛，點知就畀泛民玩到陀陀擰。其中工務小組，連埋尋日合共開咗三次特別會議，但都未處理晒十二位建制派議員嘅逾期加入申請，只係批准早前曾到小組解釋嘅議員謝偉俊申請，一於實行拖字訣玩「拉布」。

謝偉俊

工務小組委員會特別會議，昨表決通過批准謝偉俊逾期加入小組嘅申請。

范國威連限制表決權都出埋，力阻建制派議員逾期加入工務小組。

被批評浪費公帑

由於新加入小組嘅議員即時有投票權，可影響隨後加入嘅議員申請。泛民議員范國威就建議，應該喺表決晒所有逾期加入申請後，逾期加入小組嘅議員先享有表決權，唔想放生建制派。不過，佢嘅建議就連泛民都唔撐，覺得應該跟番一貫嘅做法，但泛民就認為要再次通知其餘十一位議員，畀機會佢哋再嚟小組解釋喎。

其實小組一旦否決建制派嘅申請，建制派就可以直接去財務委員會「上訴」。泛民再三搵藉口要求加開特別會議討論，只係想拖得幾耐得幾耐，難怪有建制派小組委員批評泛民以程序公義為名，實際上就係「拉布」為實，浪費時間，浪費埋納稅人金錢。

第一手消息請下載on.cc東網iPhone/iPad/Android/Windows Phone Apps