政壇：騰雞吳得掂偷步放料

其中有報道引述評論指方案「有政治含意」，即刻刺激到教育局尋日喺政府未公布《施政報告》下，已震騰騰搶先喺官網撰文為「姊妹學校計劃」護航，仲斥責「有政治含意」嘅說法係完全無事實根據，當局對此感到遺憾。唔知教育局局長「吳得掂」吳克儉係咪被國教風波嚇怕，對牽連「政治」二字過度敏感呢？

出文硬銷計劃方向

連日來有報道預告《施政報告》內容，透露教育範疇重點包括政府計劃撥款資助本港中小學，同內地學校結盟為姊妹學校，令姊妹學校由目前約四百對，增至目標六百對。教育局尋日忽然刊載一篇題為「姊妹學校計劃正面睇」嘅文章，話要為近日對姊妹學校計劃作出嘅唔同報道，說明計劃發展。

文章末段似係當局撰文嘅「精髓」所在，當局指「在近日有關姊妹學校計劃的報道中，有論者指相關工作『有政治含意』，其實完全沒有事實根據，令姊妹學校之間的學術及文化交流被政治化，我們對此表示遺憾」。

教育局唔單止要藉此抨擊有報道將姊妹學校計劃政治化，仲要透過文章「硬推銷」姊妹學校計劃並為計劃護航，之後又透露未來發展前景，「教育局將按『更廣、更深』作為姊妹學校計劃的發展方向，繼續安排本港中小學與不同省市的學校配對為姊妹學校」，似是忍唔住要偷步公布《施政報告》大方向喎。其實《施政報告》今日先正式公布，教育局又何必急於一時搶先澄清呢？可能真係「政治一日都嫌長」呀！