排檔重建增風險 食署補鑊反添亂

呢，經過三年前旺角花園街排檔奪命大火嘅慘痛教訓，食環署採取補鑊措施，資助全港四十三個排檔區小販搬遷及重建排檔，本來係為咗加強管理，減低火警風險，係無可厚非嘅，弊在食署官僚眼高手低，胡亂規劃，新排檔風險不減反增，添煩添亂。

好似啱啱完成重建嘅深水埗鴨寮街一列排檔咁吖，當局嚴格規定檔主只能喺三呎乘四呎範圍內擺賣，卒之搞到七國咁亂，怨聲載道。試諗吓，豆腐膶咁大嘅地方，連轉身都困難，企得人就擺唔到貨，擺咗貨就唔企得人，點做生意吖？分明係逼人違例經營啫。唔怪得幾乎所有檔主都喺排檔外以小型手推車當「貨架」，無形中令行人通道收窄，萬一發生緊急情況，人車爭路，後果不堪設想，上海人踩人慘劇隨時喺香港重演都似。

仲有吖，食環署規定貨物過夜必須喺攤位內密封存放，弊在新排檔空間狹窄，根本存唔到貨，唔少檔主被迫將貨物連小推車擺喺後巷，紙箱雜物堆埋一齊，大吉利是講句，如果有煙頭等火種從天而降，你話點算呢？

唔係危言聳聽o架，淨係舊年上半年咋，鴨寮街附近橫巷就發生超過十宗火警。上個月初之嘛，有人喺一幢唐樓嘅後樓梯同天台屋連環縱火，由於堆滿雜物，幾乎釀成慘劇。

講起真係諷刺，重建排檔本來係為咗避免慘劇重演，點知食環署閉門造車，顧此失彼，結果安全隱患未消除，反而玩殘檔主，累埋街坊。正如檔販話齋，新排檔完全不合時宜，幫唔到佢哋不特止，仲扼殺埋具有香港特色嘅排檔文化。

冇錯嘞，鴨寮街、花園街同女人街等排檔區歷史悠久，貨品種類齊全，係唔少遊客必到之處，亦係感受本地文化嘅活動課室，如果呢啲排檔消失，香港只剩千篇一律嘅連鎖店及名牌店，仲有乜特色可言呢？對遊客又點會有吸引力呢？當局成日話要發展多元經濟，要保留本地文化，原來又係吹水唔抹嘴。

講到底，排檔亂象叢生，檔主怨聲載道，皆因港產官僚懶惰無能，敷衍塞責。正所謂，他山之石，可以攻玉，台灣及泰國等地嘅排檔及夜市搞得有聲有色，點解港府唔識得參考人哋嘅經驗呢？叮！