政壇：搞搞政：鬍鬚曾守財奴 忽呻窮任佢噏
下月二十五日、即正月初七公布新一份財政預算案，年年批死有財赤嘅財爺鬍鬚曾近日忽然轉死性，上月率先喺網誌放風，話未來三個財政年度應可「年年有餘」，兼「科水」設立房屋儲備金，難怪市民以為派糖有望。不過，唔知佢係咪自知講大咗，近日再轉吹淡風，重施故技引用長遠財政計劃工作小組報告，恫嚇市民「結構性財赤」隨時殺到。佢想使錢時就年年有餘，想閂水喉就預計有財赤，睇嚟初七「人日」想人人有糖派認真凍過水喇！
指佔領及政改礙經濟
鬍鬚曾尋日出席中華總商會午餐會，繼續為市民做好期望管理，甫開始即以近十分鐘時間「瞬間看地球」，力數歐債危機、地緣政治風險增加，全球各國經濟都對香港產生負面影響。好嘞，返番嚟香港，鬍鬚曾又指佔領行動及政改爭議影響香港中長期經濟，盼市民唔好再喺沒完沒了、冇人得益嘅爭拗上糾纏。
但台下有中總會員趁問答環節透過主持人當面篤爆佢，質疑佢放風稱未來三年「年年有餘」係咪有違審慎理財原則。佢即時將上月嘅補鑊網誌再背誦一次，講明下年度轉虧為盈只係醫療融資開支減少嘅意外之財，長遠財政計劃工作小組仍預示有財赤危機。
其實鬍鬚曾年年係咁儲錢但又唔捨得使錢，已經畀人鬧爆孤寒兼「守財奴」，依家有錢剩就巧立名目設房屋儲備金，猶如將零頭放入第二個夾萬再儲一筆。唯一新猷似乎只係有具體措施，支援受佔領行動影響嘅商戶。至於有乜嘢措施，鬍鬚曾着大家等吓，等到「下個月」，即係喺預算案公布，意味只係一次性措施而非長遠政策囉。
