政壇：廠商會換屆創意玩自拍
香港中華廠商聯合會（廠商會）前日舉行新一屆會董就職禮，接替施榮懷嘅新任會長Eddy李秀恒，特別喺場內擺設兩部自拍相機畀所有來賓於酒會期間玩自拍，嘉賓進場時仲有鼓手敲擊會閃彩色燈嘅透明鼓，新穎得嚟有氣勢，氣氛非常熱鬧。
一班廠商會青委齊玩自拍相機。
李秀恒（左）接過施榮懷手上火炬成為新會長。
Eddy話部分場內裝飾擺設係同事構思，希望增添更多年輕活力元素，佢入場時都畀其他成員捉咗去玩自拍，一班青委成員亦齊齊戴上眼鏡同鬍鬚等道具合照，不亦樂乎。至於有會董向成員送贈三款顏色嘅煲呔，Eddy就話送煲呔係因為方便有時大家帶出街，隨時夾上恤衫用，又可以當多個選擇襯衫替換吓喎。新煲呔沿用舊有布料款式，可「繼承舊傳統，開創新意念」咁話。
Eddy喺就任致詞時就感謝上屆會董嘅努力，特別係前會長施榮懷嘅貢獻，致以衷心感謝。之後兩人互相擁抱，Eddy並喺施榮懷手上接過火炬成為廠商會新會長，象徵薪火相傳。
