聽聞立法會商界議員Jeffrey林健鋒同身兼菁英會副主席嘅兒子Victor林凱章，經常都返家鄉佛山南海，但兩父子返鄉主要係打理當地嘅玩具廠房，所以好少到當地四處遊玩。不過，Jeffrey日前就喺社交網站上載咗一張兩父子嘅合照，背景係西樵山南海觀音像，原來今次佢特別帶家人返南海探望親友，兼夾四出遊覽當地名勝，品嘗河鮮、雞仔餅等地道美食，認真了解吓家鄉情況。

林健鋒（右）同兒子林凱章企喺南海觀音像前留影。（互聯網圖片）

Jeffrey話南海係一個宜居宜商嘅好地方，旅遊業亦發展得唔錯。今次佢哋難得返去，點都抽時間四出遊玩，包括參觀廣東四大名山之一、有「珠江文明的燈塔」之稱嘅南海西樵山行咗一轉。雖然今次已經唔係佢哋第一次到訪該景點，但見到眼前咁宏偉嘅南海觀音像，依然都覺得好壯觀同嘆為觀止喎。Jeffrey仲話如果大家下次去南海旅行，記得要話佢知，因佢可推薦好多好去處畀大家。

第一手消息請下載on.cc東網iPhone/iPad/Android/Windows Phone Apps