正所謂「辛苦搵來自在食」，但喺金鐘同中環一帶嘅上班一族有時「搵食」都幾慘，食餐飯都又逼又趕。咁啱早幾日我哋遇見勞工及福利局副秘書長Donald陳羿，急急腳去咗中信大廈一間中菜館，一坐低連茶都未叫就急住點菜。

陳羿話唔會買外賣返寫字樓食，唔想整污糟枱頭文件。

問Donald點解咁趕？佢話中午得一小時放飯時間，所以要爭取時間喎。咁點解唔叫外賣返辦公室慢慢歎呢？佢就自爆有潔癖，就算工作點繁忙、天氣幾惡劣，點都唔會買外賣返寫字樓食，原因係枱頭有好多重要文件唔可以弄污，加上佢唔鍾意間房有陣食品味道，甚至怕孳生昆蟲喎。咦！咁搵佢推廣清潔香港就真係啱晒喇！

第一手消息請下載on.cc東網iPhone/iPad/Android/Windows Phone Apps