眾所周知，立法會議員人工高、福利好，逢星期三開大會更由秘書處安排兩餐甚至消夜，服侍呢班尊貴議員嘅腸胃。不過，由於秘書處只係代議員落「柯打」叫到會服務，平均每餐百幾二百蚊肯定走唔甩，加上泛民陣營發起不合作運動玩「拉布」，搞到白鴿黨嘅胡志偉為保荷包，喺今個立法會期索性捱飯盒，都唔幫襯貴價到會。

（設計圖片及對白）

立法會秘書處每年趁新會期開始，都會收集班議員叫到會膳食嘅意向，議員落「柯打」後每個月分期付款，平均千幾蚊一個月。不過，胡志偉有感以目前嘅時勢，每次大會幾乎都要拖足三日先開得完，分分鐘一日三餐都要叫到會先掂，小數怕長計下，佢寧願餐餐出去平食，一年就可以慳番萬幾蚊喇！

之不過，話說回頭，若果佢哋唔玩拉布，咁會議就唔會拖咁長，亦唔使喺立法會食三餐兼消夜，呢啲都係泛民自招嘅。

除咗胡志偉，建制派嘅鍾樹根都冇畀錢秘書處叫到會，樹根解釋係因為經常有工作飯局，寧願趁空檔出去食飯做嘢，都唔想困坐立法會。不過，樹根話佢個個月都會帶團參觀立法會，每次都好識做自掏荷包請團友食埋飯先走，每人每餐盛惠約三百蚊，一年都進貢唔少o架！

第一手消息請下載on.cc東網iPhone/iPad/Android/Windows Phone Apps