「有人辭官歸故里，有人漏夜趕科場」。尋日渣打先至宣布即時結束包括證券研究在內嘅業務，咁啱得咁蹺，六福金融主席許照中同日就話公司新近成立證券研究部，仲請咗三名生力軍，並且同大家亮相。

許照中話內地畢業生喺證券技術分析上落好多工夫，做好多鑽研，啱佢口味喎。（資料圖片）

呢批生力軍，都係喺內地大學畢業，再喺香港讀碩士，許照中坦言，鍾意請內地畢業生，貪佢哋夠上進。

吓？言下之意，佢係咪話我哋香港嘅大學畢業生唔及內地生進取上進？佢冇正面評論，只係話覺得內地畢業生喺證券技術分析上落好多工夫，做好多鑽研。話時話，睇番過往歷史，咁耐以來，許照中真係較少請所謂「財演」（財經演員）。佢話自從滬港通開車後，更加需要深入嘅A股、港股分析。呢班年輕人，好啱佢口味！

六福金融未來仲有大把嘢搞，包括增資大計，除咗現有股東「泵水」外，佢都希望有新資金加入，如意算盤就梗係想有內地資金睇中佢哋入股喇！

第一手消息請下載on.cc東網iPhone/iPad/Android/Windows Phone Apps