政壇：網民區選挑機攪亂檔
早前我哋報道過網上有班「鍵盤戰士」正密謀向建制派挑機，趁今年底舉行嘅區議會選舉，劍指全港自動當選嘅建制派或「偽獨立」議員，好似東區、觀塘同元朗區都有多名自動當選議員「駐守」，勢必係網民狙擊首選對象。不過，唔好以為首當其衝嘅係建制派，有溫和泛民政黨擔心呢批鍵盤戰士講就天下無敵，結果偷雞唔到蝕揸米，反要泛民政黨收拾殘局，令下屆區選打勝仗更添難度。
（設計圖片及對白）
雖然網民參選區議會至今仍處於吹水階段，但據知西營盤選區屬中方重地，該區對泛民變得極具戰略意義，有網民率先蠢蠢欲動下海參選。
不過，有多年區選經驗嘅溫和泛民成員提出一套選戰理論，認為選民都傾向「慣性投票」，意指今屆選擇投畀候選人Ａ，下屆都會傾向投番畀同一人，因為選民決定投票畀「對家」，需要考慮對方有乜嘢好得過上屆支持嘅候選人Ａ，但按習慣繼續投畀Ａ就唔使諗咁多，抉擇機會較低，因此多個選區都會出現區議員冧莊多屆嘅情況。
逼建制隱形選民投票
事實上，全港三百幾萬選民中唔少都冇投票習慣，假如網民只係「柴娃娃」參選而冇實際政綱，變相迫使呢班隱形選民出嚟投票，反而推高建制派得票率。若果網民敗陣後，根本無意再花四年時間落區深耕再戰，建制派來屆參選嘅基本盤就係去屆嘅得票結果，泛民再要接力落區挑機就難上加難。
難怪呢位泛民中人奉勸網民若要挑機，至少穩操多少勝券先至出戰，否則選擇純粹落區宣傳泛民理念，會更方便快捷，亦唔使幫建制派推高基本盤喇！
