錢從何來易解決 地從何來費思量

係咁嘅，房委會財務小組委員會日前通過二○一五至一六年度財政預算案，預計未來數年財政緊張，由舊年約七百億元盈餘，急跌至一九年嘅二百三十六億元，創十四年新低。委員會警告，房委會目前雖然未到山窮水盡，但唔會等到剩下二百幾億元至尋求政府注資，暗示最快會喺一七至一八年度向當局尋求注資。

即係咁，港府提出未來十年興建二十九萬個公營房屋單位目標，加上近年建築成本飆升，房委會面臨乾塘危機並唔出奇，打算向港府攞錢亦無可厚非，話晒天下無免費嘅公屋，建屋安民絕對係政府嘅責任。問題係，房委會突然為財政發預警，難免畀人一種「狼來了」嘅感覺，你知啦，港產官僚冇嘢叻，最叻就係估錯數，孤寒財爺曾俊華年年預算案都變失算案，房委會推算未來一年嘅財政都未必準確，何況係四年之後？再講吖，港府無能，覓地建屋寸步難行，十年建屋計劃隨時爛尾，到時房委會可能唔使擔心財政壓力，分分鐘仲要憂心水浸添！

所以話啫，房委會真正需要擔心嘅，唔係冇錢，而係冇地。太一叮唔係亂講，房委會預算案披露，未來五年只能興建七萬七千個公屋單位及一萬零五百個居屋單位，同原定目標仍有一大段距離，點解會咁？咪因為搵地困難囉。可以咁講，錢可以解決嘅問題唔係問題，如果當局無法打破地從何來嘅困局，就算房委會獲注資都冇用喇。

講起真係無奈，無殼蝸牛淪為「三高」犧牲品，連輪候公屋都變得遙不可及，難怪民怨沸騰，亂象叢生。更令人擔心嘅係，隨住第二輪政改諮詢啟動，新一輪政治爭拗再度展開，佔領行動隨時死灰復燃，喺咁嘅政治氣氛下，反對派全面不合作，港府覓地難上加難，公屋產量可能一縮再縮，最終受害嘅又係基層市民。

總而言之，不怕房委會乾塘，只怕公屋量縮水。各位房屋官僚，咪話太一叮唔提醒，十年建屋計劃千祈唔好走數吖，無殼蝸牛安居無望，唔使等到二○一九年，隨時會同你哋算帳吖，叮！