城中鏡：深港通呼之欲出 李小加有排忙

依家暫時未有證券界與深交所交流嘅日期同詳情，不過，從經紀反應之快，可以見到深港通正蓄勢待發，經紀有冇「大茶飯」食仍係未知數，但最緊要係快，先把握商機為上！

事實上，我哋收到料，深港通將會係港交所繼滬港通後，下一個最快推出嘅重頭戲，事關係最易做到同風險最少。按照滬港通要六個月時間籌備，初步評估深港通都唔會需要超過六個月完成籌備。換言之，唔排除深港通最快六、七月就可出台，不過，呢個當然要監管機構最後批准喇！咦，咁港交所行政總裁李小加就有排忙嘞！

由於滬港通開車時，港交所同中登等大部分基建工作已完成，深港通開唔開到車，最重要就剩低深交所嘅系統能否準備好，同埋與經紀、港交所及中登等嘅聯網測試係咪順利。

至於市場好關注嘅深港通額度同合資格投資股份，有熟悉市場人士就話深圳係內地股票市場「細佬」，按政策常理分析，「細佬」嘅條件應該不會超越「大佬」（上海），如果深港通的條件較寬鬆，相信滬港通也會獲放寬喎。