城中鏡：名人教路護眼少玩機
為內地貧困白內障患者免費做手術嘅健康快車香港基金（基金），早前搶閘喺元旦舉行新一屆理事會就職典禮暨富貴吉祥紅盤宴。講起護眼心得，由基金總理升呢做副主席嘅太子珠寶鐘錶主席Jimmy鄧鉅明話，最緊要睇少啲電腦同手機。
馬時亨（左起）、鄧鉅明同陳明耀齊齊為盆菜「開紅盤」。
方黃吉雯（右）同陳振彬拍住上做善事。
郭振華用手機過度，導致視力急速惡化。
傳統方法打電話
同樣叫Jimmy嘅深水埗區區議會主席郭振華深感認同，仲自爆最近因用眼過度而令視力急速惡化，奉勸大家要錫住雙眼咁話。Jimmy話早前佢啱啱配咗一副眼鏡，點知好快又睇唔清楚，驗眼後先知度數由二百二十五度勁增至三百度，前後只係九個月時間。所以佢奉勸大家睇少啲手機，眼攰時要謹記即刻休息，以免整壞雙眼，後悔莫及。
Jimmy鄧就話無論睇電腦或玩手機，時間千祈咪過長，雖然潮流興用手機即時傳訊功能，但係佢就好少用，寧願用傳統方法打電話同人溝通，咁樣既可拉近人與人之間嘅距離，又可以激發新嘅點子喎。
講番就職典禮，好多政商界猛人齊加入理事會做善事，包括前高官馬時亨、萬利玩具主席陳明耀同博愛醫院前副主席林賢奇都係基金副主席。基金成立十八年，做出一番成績得到社會肯定及支持，難怪創會主席方黃吉雯同基金名譽主席陳振彬笑得咁開心喇！
林賢奇都加入基金多年，覺得幫助白內障患者重拾健康好有意義，所以叫埋兒子林子泰、女兒Ivy林藹欣齊齊加入做總理，Ivy老公、縱橫遊執行董事袁振寧帶埋一對兒子去捧場。
