包括政制及內地事務局局長Raymond譚志源在內嘅政改三人組,尋日到立法會宣布展開政改第二階段公眾諮詢,人民力量議員「大舊」陳偉業發言時就大鬧譚志源同上任局長「林公公」林瑞麟一樣都係「人肉錄音機」,重複又重複回應之餘仲要了無新意,激到Raymond紮紮跳咁向主席曾鈺成投訴。Raymond話根據佢嘅記憶,大會質詢環節係唔可以用花名或別名,要求主席裁決。

(設計圖片及對白)

主席唔撐 鼓埋泡腮

當主席正要開口講嘢時,大舊即時彈起身話林公公已經去咗讀神學,反寸Raymond無嘢搵嘢嚟講。不過,曾鈺成話唔覺得大舊嘅言論有違反《議事規則》,要求Raymond繼續答問題。社民連「長毛」梁國雄喺呢個時候就爆出一句:「太監通常都係讀神學」,曾鈺成就即時叫長毛收口,話出席會議嘅官員同議員一樣享有同等權利,要求議員尊重官員。

Raymond話,既然曾鈺成已經作出裁決,佢會尊重主席嘅決定。不過,佢呢頭話尊重裁決,嗰頭就託人傳張紙仔畀曾鈺成。曾鈺成睇完張紙仔後即時攞本《議事規則》揭咗幾揭,再喺張紙仔上寫咗幾行字還畀Raymond。Raymond睇完張紙仔後即時翹晒手兼鼓埋泡腮,似乎唔多滿意主席嘅解釋。

第一手消息請下載on.cc東網iPhone/iPad/Android/Windows Phone Apps